返回列表 發帖

粉嶺逸峯三分一冷氣機壞 唔凍滴水驚現結霜

大熱天時無冷氣,業主谷到一肚氣。李兆基旗下恒地(012)粉嶺逸峯入伙約3年半,多個住戶慘受冷氣機困擾。近35%住戶入伙以來,入伙時附送的冷氣機都有大小不同的問題,包括唔凍、滴水、異味。


麥小姐一屋4部冷氣機,整足3年沒完沒了,直擊另一個兩房單位,冷氣開了等於無開,失驚無神仲結霜。恒地回應,保養期已過,業主向管業處查詢或直接聯絡冷氣機供應商。另一名業主趙生不滿,認為發展商「賴貓!」
2015年年初麥小姐收樓,第一年夏天發覺冷氣機就出現問題,「全屋4部冷氣機,各有各問題,廳個部唔涼,兩個仔間房個部一開機就有陣嗡味,主人房個部一開就沙沙聲。入伙個陣有試,但試個陣係夜晚,又開唔耐,唔覺有問題。」發展商派冷氣機師傅檢查及維修,懷疑漏雪種,整完第一間暑假有冷氣用。沒料到翌年冷氣機又出現問題,「唔涼,直情吹暖風出來,校到18度都唔係好涼,跟住又搵管理處,又係派個兩位師傅來睇再整,整到去年,年年都整,整完都有問題。

至了今年,到主人房冷氣機滴水,滴到下面啲燈濕哂。同老公講,算啦,唔得就換咗佢。但老公話,買層樓幾百萬,無理由用一、兩年就哂幾萬蚊去換。」後來認識同舟人,她稱:「睇埋屋苑facebook,原來有啲業主都係咁,有朋友冷氣甚至結冰,我都算好彩,有啲直情用唔到,好多業主求助無門。」她不滿道:「一部冷氣機無理由三四年就換,要換,梗係離譜啦!唔離譜都唔會出聲。想俾人知道,恒基管理、服務係唔得。」

屋苑去年10月份進行問券調查,向全苑728戶發出問券,回收275份,當中254戶,佔屋苑戶數35%,承認單位冷氣機曾經或現時正出現問題,主要問題為滴水、製冷不良。有109戶表示發展商提供的保養期內曾維修及檢查冷氣機,反映冷氣機入伙初期已出現問題。由2016年1月至2018年6月,屋苑近乎月月搭棚維修冷氣機。


記者到訪一個兩房單位,時值中午30幾度,客飯廳開住2部風扇,冷氣機有風吹出卻不涼。業主感嘆:「住3年幾,呢部冷氣機整過好多次,先是唔涼,跟住滴水,後來發現去水喉裝錯。主人房冷氣機更離譜,原本附送搖控器唔掂,換另一個,但透過搖控器關機,熄一熄,機身竟然結霜。後來師傅話新搖控器只熄扇葉,無熄掉機身引擎,必須熄去相連電掣才完全關掉,於是無端端要裝多個搖控器控制電源。」

恒地發言人回覆 ,屋苑自2014年年底入伙,至今逾三年半,隨樓附送之家庭電器所提供的一年保固期亦早已屆滿,唯其後有個別業主要求跟進冷氣機事宜,客戶服務組亦有盡力提供協助。如業主有需要檢查或維修冷氣,可向屋苑管業處查詢,或直接聯絡冷氣機供應商。


然而入伙至今冷氣機問題沒完沒了,業主趙生指出,目前街坊檢查及維修冷氣機均自掏荷包,除了每次數百至逾千元不等,若需要搭棚,更再支付二千多元。「產品有問題,應該供應商派人免費維修。呢個唔係保養期過後嘅問題,一開始成批貨根本有問題,唔係我哋業主打橫來講。」對於恒地的回應,他怒斥:「懶貓!拍下蘿柚就算數!」本周日逾70戶業主舉行特別大會,要求發展商跟進有問題冷氣機。


https://hk.finance.appledaily.com/finance/realtime/article/20180622/58345472

返回列表